Revista spanjolle “El Economista” për Shqipërinë: Turizmi po rrit ekonominë
Ndikimi që ka turizmi në ekonominë shqiptare ishte objekti i një shkrimi të revistës spanjolle “El Economista”. Shqipëria, një vend i vogël ballkanik, po përjeton një bum të vërtetë turistik që po katapulton ekonominë e saj. Prurjet masive të vizitorëve, kryesisht në plazhet e rivierës shqiptare, po e transformojnë ndjeshëm ekonominë në vend, shkruhet në këtë artikull .
Me një popullsi afërsisht 2,8 milionë banorë, gjithsej 8,5 milionë turistë të huaj kanë udhëtuar drejt vendit mesdhetar në periudhën korrik-gusht të këtij viti. Ndërsa në vitin 2023 u regjistruan 10,1 milionë turistë te huaj.
Ndonëse popullsia e tij rezidente nuk arrin në 3 milionë banorë, e vërteta është se ‘populli shqiptar’ është shumë më i madh. Vlerësohet se janë rreth 1,7 milionë shqiptarë që jetojnë jashtë vendit. Ky vend shquhet për tolerancën e tij fetare shkruan revista spanjolle. Me gjithë këto stimuj, nuk është për t’u habitur që Shqipëria është kthyer në një atraksion kaq të rëndësishëm turistik, jo vetëm plazhet e saj por edhe për malet e bukura qe tërheqin vëmendjen.
Përmirësimi i ekonomisë së shpejti mund të mundësojë që disa nga ata shqiptarë jashtë vendit të fillojnë të kthehen thekson në revistën “El Economista” .
PBB-ja shqiptare u rrit me 3,4% në vitin 2023, mbështetur nga kërkesa e fortë e brendshme dhe performanca e jashtëzakonshme e sektorit të turizmit, e cila arriti nivele rekord në vend.
Gjithashtu, komponenti i investimeve shënoi një rritje të ndjeshme, i mbështetur nga investimet private, duke përfshirë flukset e larta hyrëse të investimeve të huaja direkte.
Momenti i fortë i rritjes mbështetet nga një bum në sektorin e turizmit, rritja e investimeve dhe pagat më të larta nënvizon revista spanjolle për vendin tonë.
