Rindërtohet shkolla e dëmtuar nga tërmeti në Lezhë / Investimi në shkollën “Fran Ivanaj”, pjesë e programit “EU4Schools” / “BE për Shkollat”

Një tjetër objekt arsimor i dëmtuar nga tërmeti i 26-nëntorit të vitit 2019-të është rindërtuar në Lezhë. Bëhet fjalë për shkollën 9-vjeçare dhe kopshtin “Fran Ivanaj” në Ishull-Shëngjin, e cila është riparur plotësisht dhe përforcuar si pjesë e Programit “EU4Schools” / “BE për Shkollat” në bashkëpunim me UNDP.

Inagurimi i këtij investimi mjaft të rëndësishem në prani të përfaqësuesve të Bashkimit Evropian, Programit për Zhvillim të Kombeve të Bashkuara, Ministrisë së Arsimit dhe Bashkisë Lezhë.

Duke iu referuar kësaj shkolle të rindërtuar, zv/ministrja e Arsimit, Nina Guga,  dhe kryebashkiaku i Lezhës, Pjerin Ndreu, vlerësuan këtë investim bashkëkohor dhe me standarte në fushën e arsimit.

Programi “BE për Shkollat” financohet nga Bashkimi Evropian me një vlerë prej 75 milionë Euro dhe zbatohet nga Programi për Zhvillim i Kombeve të Bashkuara në Shqipëri (PNUD) në bashkëpunim me Qeverinë Shqiptare. Deri më tani kanë përfunduar 45 objekte arsimore dhe 14 të tjera janë aktualisht në proces rindërtimi apo riparimi.