Romë/ Ku përfundojnë monedhat e hedhura nga turistët në shatërvanin e Trevit?

Për qindra vjet, vizitorët në Romë janë dyndur në Shatërvanin e Trevit për të shprehur një dëshirë, duke hedhur monedha me dorën e djathtë, mbi shpatullën e majtë, në ujin e shatërvanit.

Këto monedha , të cilat përcjellin dëshira për dashuri apo shëndet të mirë, u japin ndihmë të konsiderueshme njerëzve që turistët nuk do t’i takojnë kurrë.

Monedhat grumbullohen për disa ditë dhe më pas hiqen dhe dërgohen në degën e Romës të organizatës globale të bamirësisë katolike Caritas, e cila i përdor ato për të financuar një bankë ushqimore, një kuzhinë sociale dhe programe të tjera të mirëqenies. Në vitin 2022 Caritas mblodhi 1.4 milionë euro nga shatërvani dhe pret të ketë mbledhur edhe më shumë në vitin 2023. Roma është një nga qytetet më të vizituara në botë me 21 milionë turistë në vit.

Si mblidhen monedhat

Nxjerrja e monedhave është një spektakël më vete dhe përfshin punëtorë nga Ndërmarrja Komunale e Energjisë Elektrike dhe Ujësjellës (ACEA) që përdorin fshesa të gjata dhe tuba thithës.

Dy herë në javë, deri në katër punëtorë mbledhin monedhat, tha drejtori i ACEA Francesco Prisco. Shatërvani zbrazet për pastrim dy herë në muaj. “Operacionet e grumbullimit dhe pastrimit po kryhen sa më shpejt që të jetë e mundur në përpjekje për të minimizuar kohën e mbylljes së shatërvanit,” thotë ai. Pasi monedhat mblidhen në një rresht të gjatë me fshesa, ato pastrohen dhe dërgohen në zyrën e Caritas-it, ku punonjësi Fabrizio Marchioni i shtrin në një tavolinë të madhe tharjeje me tharëse.

Më pas monedhat ndahen, renditen dhe numërohen. Në fund të fundit, nga shatërvani nuk peshkohen vetëm monedha. Në Caritas kanë mbërritur edhe bizhuteri, proteza e varëse fetare.

Supermarketi i Caritas-it, i njohur si Emporium, ndodhet pranë stacionit qendror të Romës dhe furnizon me ushqim banorët në nevojë.

Gjoba për hyrje në shatërvan dhe vjedhje

Shatërvani i Trevit, i përfunduar në 1762 , mbulon njërën anë të Palazzo Polit në Romën qendrore, me statujat e Tritonit dhe kuajt që tërheqin qerren e perëndisë Oqeani, duke zbutur ujërat.

Është vendi ku regjisori Federico Fellini vendosi një nga skenat më të famshme të kinemasë në La Dolce Vita , me Anita Eckberg që hyn në shatërvan pas mesnate dhe i bën shenjë Marcello Mastroianni-t ta ndjekë atë.

Sigurisht, sot zhytja në ujëra është rreptësishtë e ndaluar dhe turistët përballen me gjoba nëse e bëjnë këtë. Siç është e ndaluar edhe vjedhja e monedhave, të cilat disa e kanë tentuar t’i marrin edhe me magnet./CNN.gr