“Rozafa” e nis vitin mbarë – Janari shënoi një rritje prej 8% në raport me të njëjtën periudhë të vitit 2024
Kalaja e Rozafës është një nga atraksionet më të njohura turistike në Shkodër dhe në gjithë Shqipërinë.
Ajo ofron një kombinim të historisë, legjendës dhe pamjeve spektakolare, duke e bërë një vend tërheqës për vizitorët vendas dhe të huaj.
Vitin e kaluar, siti arkeologjik pati një rritje mbresëlënëse teksa u vizitua nga 160 mijë turistë, shifër kjo, më e larta e regjistruar ndonjëherë.
Në krahasim me vitin 2023, rritja rezultoi 26% më shumë.
Vizitorët e huaj janë përherë e më të pranishëm në këtë objekt të lashtësisë si në mënyrë individuale ashtu edhe të organizuar në grupe.
DRTK Shkodër ka publikuar shifrat e vizitueshmërisë për muajin e parë të vitit 2025. Janari rezulton me 4 mijë vizitorë duke vijuar trendin pozitiv të rritjes.
Në krahasim me të njëjtën periudhë të vitit të kaluar ka një rritje prej 8% të numrit të turistëve.
Kalaja “Rozafa” është një ndalesë e rëndësishme për të gjithë ata që vizitojnë kryeqendrën e veriut.
Historia dhe arkitektura, legjenda, pamjet panoramike si dhe atraksionet brenda kalasë po paraqesin interes gjithnjë e më shumë për vizitorët vendas dhe të huaj që duan të njohin trashëgiminë tonë kulturore.
