Rrezikohen kalimtarët nga rënia e tjegullave – Ndërmarrja e Shërbimeve Publike ndërhyn duke larguar nga rruga inertet
Këto tjegulla të rëna në tokë dhe një pjesë e fasadës së një banese, rrezikuan jetën e kalimtarëve.
Siç e shikoni në këto pamje , është shembur një pjesë e kësaj banese dykatëshe në rrugën “Babej” në qendër të Shkodrës, ngjitur me Shtëpinë e të Moshuarve.
Nga shembja e ndërtesës nuk është lënduar asnjë person, ndërsa konsiderohet me rrezikshmëri të lartë për kalimtarët.
Përballë kësaj situate, banorët i kanë bërë thirrje institucioneve përkatëse që të ndërhyjnë për të shmangur ndonjë tragjedi të mundshme.
Sakaq, Ndërmarrja e Shërbimeve Publike pranë Bashkisë Shkodër, ka ndërhyrë menjëherë duke pastruar inertet, si pasojë e shkëputjes së një pjese të fasadës.
Ndërkohë, policia bashkiake pritet që të bëjë edhe rrethimin në pjesën përpara të ndërtesës, si dhe u bën thirrje qytetarëve të mos kalojnë aty pranë, pasi çatia është gati në shembje.
Lënia në harresë e disa prej ndërtesave të vjetra në zona të ndryshme të qytetit të Shkodrës po krijon dita-ditës rrezik për kalimtarët e shumtë.
