Rrëzimi i avionit ushtarak, Zelensky: Akt kriminal i Moskës, do kërkojmë hetim ndërkombëtar

Presidenti ukrainas Volodymyr Zelensky ka akuzuar Moskën për rrëzimin e avionit ushtarak dhe se po vendos në rrezik vazhdimisht jetët të burgosurve ukrainas.

Ai kërkoi një hetim ndërkombëtar pas rrëzimit të avionit ushtarak në rajonin Belgorod pranë kufirit të Ukrainës ku humbën jetën të gjithë ata që ndodheshin në bord, përfshirë edhe të burgosurit ukrainas.

Rusia tha se nuk kishte të mbijetuar pasi sipas saj ishte Kievi që kishte rrëzuar aeroplanin Il-76 me 65 robër lufte ukrainas, 6 anëtar të ekuipazhit rus dhe tre shoqërues.

Moska pretendoi se ukrainasit po fluturonin për një shkëmbim të burgosurish. Nga ana tjetër, inteligjenca ushtarake e Ukrainës (GUR) tha se nuk i ishte vënë në dijeni të siguronte hapësirën ajrore të sigurt, si në rastet e mëparshme.

Komentet e GUR janë parë si një pranim i heshtur se Ukraina qëlloi avionin e transportit ushtarak, megjithëse theksoi se nuk kishte informacion të besueshëm se kush ishte në bord dhe paralajmëroi se incidenti mund të kishte përfshirë “veprime të planifikuara dhe të qëllimshme nga Rusia”.

Zelensky tha se ishte e qartë se rusët po luajnë me “jetët e të burgosurve ukrainas, me ndjenjat e të afërmve të tyre dhe me emocionet e shoqërisë sonë”.

Zëdhënësi i Kremlinit Dmitry Peskov dënoi rrëzimin e aeroplanit si një “akt monstruoz”, sipas agjencive ruse të lajmeve. Ai u tha gazetarëve se nëse Zelensky kërkon një hetim ndërkombëtar, duhet ta kërkojë për “veprimet kriminale të regjimit të Kievit” siç e quajti ai.