Rritet bilanci i atentatit në Moskë, 115 viktima. Arrestohen 4 terroristë, inteligjenca ruse: Kishin kontakte me Ukrainën

Ka shkuar rreth 115 persona numri i viktimave dhe rreth 142 të plagosur nga sulmi terrorist i ndodhur më 22 mars në një sallë koncertesh në periferi të Moskës.

Persona të armatosur hapën zjarr mes turmës së njerëzve si dhe hodhën lëndë djegëse në sallë duke i vënë flakën.  Media shtetërore Rusia 24 raportoi se zjarri ishte vënë kryesisht nën kontroll më shumë se gjashtë orë më vonë.

ISIS ka marrë përgjegjësinë për sulmin, ndërsa 4 persona të përfshirë drejtpërdrejt në sulmin në sallën e koncerteve në Moskë janë në mesin e 11 të arrestuarve, thotë shefi i sigurisë së Rusisë.

4 burrat e dyshuar për kryerjen e sulmit në kompleksin Crocus City pranë Moskës u arrestuan ndërsa po përpiqeshin të kalonin kufirin rus me Ukrainën, tha Shërbimi i Sigurisë Ruse

“Shërbimet speciale dhe agjencitë e zbatimit të ligjit në rajonin Bryansk, pranë kufirit me Ukrainën, arrestuan katër të dyshuar nga ata që kryen një sulm terrorist në sallën e koncerteve Crocus City Hall”, tha Shërbimi i Sigurisë Ruse.

Sipas medias shtetërore RIA Novosti, “armët e përdorura nga terroristët ishin përgatitur paraprakisht në një depo, raportoi FSB [Shërbimi i Sigurisë]. Pas sulmit terrorist, kriminelët synonin të kalonin kufirin e Federatës Ruse dhe Ukrainës dhe kishin kontakte përkatëse në anën ukrainase, tha FSB”.

Agjencia shtetërore ruse e lajmeve TASS raportoi gjithashtu se sulmuesit kishin “kontakte në anën ukrainase. Sulmi terrorist në Bashkinë e Crocus ishte planifikuar me kujdes.”

Ukraina ka mohuar me forcë çdo lidhje me sulmin. Një zyrtar, Mykhailo Podolyak tha në një postim në X të premten se Ukraina “asnjëherë nuk është përdorur në përdorimin e metodave terroriste. Është gjithmonë e pakuptimtë.”

Sulmi terrorist në Moskë është dënuar nga Britania e Madhe dhe SHBA. Sekretari i Jashtëm britanik, David Cameron tha se Mbretëria e Bashkuar dënon “në termat më të fortë sulmin terrorist vdekjeprurës” në Moskë që ndodhi të premten mbrëma.

“Ne ofrojmë ngushëllimet tona të përzemërta dhe shprehim ngushëllimet tona më të thella për familjet e shumë viktimave. Asgjë nuk mund të justifikojë kurrë një dhunë të tillë të tmerrshme,” shkroi Cameron në X.

Sulmi i së premtes ishte sulmi terrorist më vdekjeprurës në Moskë në dekada dhe erdhi më pak se një javë pasi Presidenti Vladimir Putin fitoi zgjedhjet me një shumicë dërrmuese për të siguruar një mandat tjetër në detyrë, duke shtrënguar kontrollin e tij në vendin që ai ka drejtuar.