Rrjeti kullues dhe vaditës – Bashkia Shkodër punon paralelisht për kanalet kulluese dhe vaditëse

Prej disa ditësh, Ndërmarrja e Shërbimeve Publike në Bashkinë Shkodër po punon për pastrimin e kanaleve në njësitë administrative.

Në fshatin Bleran, Njësia Administrative Rrethina, është bërë i mundur pastrimi i një kanali kullues me gjatësi 2 km. Kjo ndërhyrje synon përmirësimin e shërbimeve për banorët e zonës.

Gerald Gasa, administrator i Njësisë Administrative Rrethina, theksoi se puna vazhdon dhe se do të ketë efekte të dukshme për të gjithë komunitetin.

Ndërkohë, në Njësinë Administrative Guri i Zi po kryhen rikonstruksione të kanaleve vaditëse me gjatësi 4 km, që do t’u shërbejnë disa fshatrave të kësaj njësie për vaditjen e tokave bujqësore.

Përveç pastrimit të kanaleve, po realizohet edhe transportimi i mbetjeve, si dhe sistemimi i barrierave mbrojtëse në zonën e Bleranit, gjatë këtij fillimi viti. Më pas, puna do të vijojë në zona të tjera problematike si Muriqani dhe Dajçi.