“Rrugët alternative”, të rinjtë në fushën e teknologjisë – Konkurs mes shkollave të mesme të Malësisë së Madhe
Në shkollën “Abdyl Bajraktari” në Koplik, Malësi e Madhe, u zhvillua konkursi mes shtatë gjimnazeve të kësaj bashkie, ku nxënësit prezantuan projektet e tyre të realizuara me pajisje robotike micro:bit. Konkursi u organizua nga Këshilli Britanik në bashkëpunim me Agjencinë e Sigurimit të Cilësisë së Arsimit Parauniversitar pranë Ministrisë së Arsimit.
Nxënësit thanë se idetë dhe projektet e tyre janë konceptuar për të sjellë përfitime jo vetëm për shkollat e tyre, por edhe për komunitetin përreth.
Drejtuesit e programit vlerësuan punën e nxënësve, duke theksuar se projektet janë dëshmi e interesit dhe përgatitjes së tyre në fushën e teknologjisë.
Përfaqësuesit e Zyrës Vendore të Arsimit në Malësinë e Madhe e konsideruan këtë aktivitet si shumë të rëndësishëm për nxitjen e kreativitetit dhe zhvillimin e aftësive të reja tek të rinjtë.
Çmimi I parë ne këtë konkurs iu dha projektit të realizuar nga nxenesit e gjimnazit “Sherif Hoxha” ne qytetin e Koplikut. Ndërkohë fituesit e tre vendeve të para do të përfaqësojnë Malësinë e Madhe në konkursin kombëtar, ku do të kenë mundësinë të prezantojnë edhe një herë projektet e tyre inovative.
