RTSH marrëveshje me diasporën, programet e para transmetohen brenda 6 muajve

Radio Televizioni Shqiptar dhe Parlamenti Paqësor i Kombit Shqiptar për Diasporën në Gjermani firmosën një marrëveshje bashkëpunimi për sukseset e çdo shqiptari në diasporë, për t’u pasqyruar në kanalin RTSH 3.

Kjo marrëveshje përfshin çështjet e integrimit, kulturës dhe modeleve të suksesit të shqiptarëve në diasporë në të gjitha fushat e jetës.

Marrëveshja u nënshkrua mes Drejtoreshës së Përgjithshme të Radio Televizionit Shqiptar, Aurora Polo dhe kryetarit të Parlamentit Paqësor të Diasporës, Can Tahiri.

“Kemi menduar që në kanalin RTSH 3 të lëmë një hapësirë për diasporën për të gjithë shqiptarët jashtë atdheut, të cilët janë shumë. Sapo u njoftuam që u nevojitet një bashkëpunim për diasporën nuk hezitova ndaj këtij bashkëpunimi”, u shpreh Polo.

Kryetari i parlamentit paqësor të kombit shqiptar, Can Tahiri tha se qëllimi i bashkëpunimit është sjellja e diasporës më afër atdheut.

“Bashkëpunimi me RTSH, është rikthim, në fakt, pasi e kemi. Kryesisht do të jetë për çështje kulture, arsimi, çështje kombëtare dhe humanizëm, dhe në të ardhmen prezantimi i shqiptarëve të suksesshëm nëpër botë, nëpër diasporën shqiptare. Qëllimi është të afrojmë diasporën më afër atdheut”, tha Tahiri.

Nga ana e tij, anëtari i Këshillit Drejtues, Ëngjëll Ndocaj, vlerësoi bashkëpunimin.

“Kjo firmë sot me komunitetin shqiptar, që jeton në Gjermani, është shumë e rëndësishme, pasi nuk është vetëm Gjermania, por dhe vendet afër saj na interesojmë t’i sjellim, t’i pasqyrojmë,” tha Ndocaj.

Emisionet e para të këtij cikli është parashikuar të transmetohen brenda 6 muajve në kanalin RTSH 3.