Rupert Murdoch, krijuesi i Fox News, jep dorëheqjen nga posti i kreut të News dhe Fox Corp

Rupert Murdok (Murdoch), manjati 92- vjeçar i medias australiane, i cili krijoi Fox Neës që e bëri atë një forcë në politikën amerikane, po largohet si udhëheqës i kompanisë mëmë të Fox-it, si dhe aksioneve të tij mediatike News Corp.

Fox tha të enjten se Murdok do të bëhej kryetar emeritus i të dy kompanive, që do të bëhet efektiv në mbledhjet e bordit në nëntor. 

Djali i tij, Laklan (Lachlan), do të bëhet kryetar i News Corp dhe do të vazhdojë si shef ekzekutiv i Fox Corp. Laklan Murdok tha se “ne jemi mirënjohës që ai do të shërbejë si kryetar emeritus dhe e dimë se do të vazhdojë të ofrojë këshilla të vlefshme për të dy kompanitë”.

Përveç Fox News, Murdok i cili e filloi ngjitjen me rrjetin e transmetimit të Fox, ishte i pari që sfidoi me sukses Big Three të ABC, CBS dhe NBC, me shfaqje si “The Simpsons”. Ai është pronar i The Wall Street Journal dhe New York Post.

Fox News Channel ka influencuar thellësisht në televizionin dhe politikën e kombit që nga fillimi i tij në 1996, duke e bërë Murdok një hero për disa dhe i keq për disa të tjerë. Rrjeti 24-orësh konvertoi fuqinë dhe energjinë e radio bisedave politike në televizion. Brenda gjashtë viteve, ajo tejkaloi CNN dhe MSNBC.

Por ky vit ka qenë një vit i vështirë për Fox, i cili u detyrua të paguante 787 milionë dollar për të zgjidhur një padi për shpifje, në lidhje me mbulimin e pretendimeve të rreme pas zgjedhjeve presidenciale të 2020. Menjëherë pas kësaj, Fox shkarkoi personalitetin e saj më të njohur, Tuker Karlson (Tucker Carlson).

Murdok u zotua në një letër drejtuar punonjësve se do të mbetej i angazhuar në Fox. AP