Santos bie nga kategoria për herë të parë në histori

Ekipi brazilian Santos ka rënë në kategorinë e dytë të futbollit brazilian për herë të parë në historinë e tij. Skuadra në të cilën, në të kaluarën kanë luajtur kampionë të kalibrit si Pele dhe Neymar, pas 115 vitesh histori, sezonin e ardhshëm do të jenë pjesë e Ligës B. Humbja ndaj Fortalezas me rezultatin 1-2 rezultoi fatale për bardhezinjtë. 

Duke parë situatën e vështirë të skuadrës, tifozët e Santosit tentuan të hynin në fushë përpara fërshëllimës së arbitrit. Në këtë mënyrë kryesori u detyrua të mbyllte ndeshjen më herët, duke i lënë dëshpërimin tifozëve dhe lojtarëve të Santosit, ndërsa ata të Fortaleza-s vrapuan menjëherë për në dhomat e zhveshjes.

Në përpjekje për t’i mbrojtur lojtarët e Santosit, ushtria u detyrua të hyjë në fushë për të evituar të keqen më të mundshme.  Pak nga pak stadium u boshatisu,  por jo para se të hidheshin objekte ndaj lojtarëve të Santosit. Jashtë stadiumit situata ishte edhe më e rëndë. Përleshje me forcat e rendit, djegje makinash dhe autobusësh, qyteti i Sao Paolos u kthye në një kaos të vërtetë.

Policia u detyrua të përdorte gaz lotsjellës për të shuar zemërimin e ultrasve. Një natë e tmerrshme dhe e pafund për atë që ishte ndoshta faqja më e errët në historinë e Santosit.