Sekretari i Përgjithshëm i OKB-së dënon sulmin në spitalin e Gazës: Ngjarje e tmerrshme

Sekretari i Përgjithshëm i OKB-së, António Guterres ka dënuar sulmin vdekjeprurës në një nga spitalet e Gazës.

Guterres tha se ishte “i tmerruar” nga qindra njerëz të vrarë pas shpërthimit të martën dhe bëri thirrje për një armëpushim të menjëhershëm humanitar në rajon.

“Unë jam plotësisht i vetëdijshëm për ankesat e thella të popullit palestinez pas 56 vitesh okupim, por sado serioze të jenë këto ankesa, ato nuk mund të justifikojnë aktet e terrorit kundër civilëve të kryera nga Hamasi më 7 tetor, të cilat unë i dënova menjëherë. Por ato sulme nuk mund të justifikojë ndëshkimin kolektiv të popullit palestinez”, tha Guterres të mërkurën.

Sipas deklaratës së zëdhënësit të OKB-së, Stephane Dujarric, Guterres theksoi se spitalet së bashku me klinikat, personelin mjekësor dhe ambientet e OKB-së mbrohen sipas ligjit ndërkombëtar.

Sekretari i Përgjithshëm dënoi gjithashtu sulmin në një shkollë të UNRËA në kampin e refugjatëve Al-Maghazi në Gaza të martën, i cili vrau të paktën gjashtë persona.

“Sekretari i Përgjithshëm shpreh ngushëllimet e tij të sinqerta për familjet e viktimave dhe uron shërim të shpejtë të plagosurve”, thuhet në deklaratë.

Guterres pritet të udhëtojë në Egjipt më vonë këtë javë ku do të takohet me presidentin Abdel Fattah el-Sisi dhe të tjerë për situatën në rajon.

Shefi i OKB-së ka apeluar më parë për lirimin e pengjeve që mbahen nga Hamasi në Gaza dhe për lejimin e ndihmës ndërkombëtare në enklavë.