Sekuestrohen 331 mijë euro në  PKK Muriqan – Paratë po tentoheshin të futeshin ilegalisht  në Shqipëri

Policia e Shkodrës ka finalizuar me sukses në PKK Muriqan  një operacion të koduar “Zinxhiri”, për goditjen e një rasti të mosdeklarimit të parave, që dyshohet janë përfituar nga veprimtaritë kriminale.  

Sipas burimeve zyrtare të policisë, për këtë rast  është arrestuar një shtetas 36- vjeçar, banues në Kryemadh, dhe ka nisuar procedimi në gjendje të lirë për një shtetas 35-vjeçar, banues në Lezhë.   

Gjatë operacionit, bazuar në informacionet e siguruara nga inteligjenca policore, shërbimet e Policisë në PKK Muriqn  kanë kaluar për kontroll në vijën e dytë, automjetin tip “Mercedez Benz” me drejtues shtetasin me inicialet F. H. dhe pasagjer shtetasin me inicialet P. M. 

Gjatë kontrollit, në dy hapësira të modifikuara (në pjesën e tavanit dhe të bagazhit të automjetit), u gjetën 331 000 euro, që këta shtetas po tentonin t’i fusnin ilegalisht në Shqipëri.   

Shuma e parave u sekuestrua në cilësinë e provës materiale, bashkë me automjetin dhe 2 celularë. 

Aktualisht po vijojnë hetimet për të provuar burimin e parave.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.