SHBA-Britani sulmojnë bazat Houthi në Jemen, Irani dhe Hezbollahu: Do paguajnë “çmimin”

Ministria e Jashtme e Iranit ka dënuar sulmet në Jemen si një shkelje të sovranitetit dhe integritetit territorial të Jemenit dhe një shkelje të ligjeve ndërkombëtare.

“Sulmet “nuk do të kenë asnjë rezultat tjetër përveç nxitjes së pasigurisë dhe paqëndrueshmërisë në rajon“, tha zëdhënësi i ministrisë Nasser Kanani.

Ndërkohë grupi i armatosur libanez Hezbollah i mbështetur nga Irani dënoi gjithashtu sulmet në Jemen.

“Agresioni amerikan konfirmon edhe një herë se SHBA-të janë partnere të plota në tragjeditë dhe masakrat e kryera nga armiku sionist në Gaza dhe në rajon”, tha grupi i mbështetur nga Irani.

Forcat amerikane dhe aleatët e saj goditën më shumë se 60 objektiva në 16 lokacione të përdorura nga rebelët Houthi në Jemen. Lajmi u bë me dije nga Forcat Ajrore të SHBA.

Sulmet përfshinë nyjet e komandës dhe kontrollit, depot e municioneve, sistemet e lëshimit, objektet e prodhimit dhe sistemet e radarëve të mbrojtjes ajrore.

Më shumë se 100 municione të drejtuara me saktësi u përdorën në sulme.

“Ne mbetemi të përkushtuar ndaj partnerëve tanë kritikë në të gjithë Lindjen e Mesme për t’u mbrojtur kundër grupeve të milicisë të mbështetur nga Irani, duke përfshirë militantët Houthi, dhe kërcënimin që ata paraqesin për sigurinë dhe stabilitetin rajonal”, tha Komandanti Qendror i Forcave Ajrore të SHBA-së, gjeneral-lejtant Alex Grynkewich.