SHBA nis aksionin diplomatik, synon të pengojë Izraelin që të godasë kryeqytetin e Libanit pas sulmit në Golan
Uashingtoni është përfshirë në një aksion diplomatik për të shmangur një luftë të plotë midis Izraelit dhe lëvizjes libaneze Hezbollah, pasi grupi militant i mbështetur nga Irani në Golanin e pushtuar nga Izraeli, vrau 12 të rinj në fundjavë, sipas pesë personave që përfshijnë zyrtarë libanezë , iranianë dhe diplomatët evropianë në Lindjen e Mesme.
Fokusi i diplomacisë amerikane synon të kufizojë reagimin e Izraelit duke e nxitur të mos sulmojë Bejrutin me popullsi të dendur, periferitë jugore të tij ose infrastrukturën kyçe si aeroportet dhe urat, thanë burimet për Reuters, që kërkuan të mbeten anonime. Zyrtarë libanezë thanë se kishin qenë në kontakt me ndërmjetësit amerikanë që nga sulmi në Golan.
Ndërkohë zyrtarët izraelitë thonë se vendi i tyre do ta sulmojë Hezbollahun, por jo ta përfshijë rajonin në një luftë gjithëpërfshirëse. Departamenti Amerikan i Shtetit tha se nuk do të komentonte mbi specifikat e bisedimeve diplomatike, megjithëse po kërkonte një zgjidhje të qëndrueshme për t’i dhënë fund shkëmbimit të zjarrit ndërkufitar mes Izraelit dhe Hezbollahut.
Zëdhënësi i Shtëpisë së Bardhë, John Kirby, u tha gazetarëve se Izraeli kishte çdo të drejtë t’i përgjigjej sulmit të Golanit, por se askush nuk dëshironte përhapjen e luftës. Një zyrtar iranian tha se Shtetet e Bashkuara i kishin përcjellë mesazhe Teheranit të paktën tre herë që nga sulmi i në Golan, duke paralajmëruar se përshkallëzimi i situatës do të ishte i dëmshëm për të gjitha palët.
Më herët, kabineti i sigurisë i kryeministrit izraelit Netanyahu, i cili ka diktuar politikën për luftën në Gaza dhe sulmet ndaj Hezbollahut, autorizoi kryeministrin dhe ministrin e mbrojtjes të vendosin për mënyrën dhe kohën e përgjigjes kundër grupit libanez.
Ndërkohë vendet perëndimore u kanë bërë thirrje qytetarëve të tyre të largohen nga Libani, ndërsa disa kompani ajrore kanë pezulluar fluturimet drejt atij shteti. Nga sulmi në një fushë futbolli në Lartësitë e Golanit u vranë 12 fëmijë dhe u plagosën 20 persona të tjerë.
