SHBA paketë të re ndihme për Kievin, Biden: 425 milionë dollarë për të ndihmuar Ukrainën
Presidenti Joe Biden zhvilloi të mërkurën një bisedë telefonike me Presidentin ukrainas Volodymyr Zelensky, ku e njoftoi për një paketë të re ndihme në fushën e sigurisë me vlerë 425 milionë dollarë. Në një njoftim të Shtëpisë së Bardhë thuhet se paketa përfshin armatim shtesë për mbrojtjen ajrore, raketa tokë-ajër, automjete të blinduara dhe armatime të tjera thelbësore për të trajtuar nevojat urgjente ushtarake të këtij vendi.
Biden synon të forcojë mbështetjen ushtarake amerikane për Ukrainën para zgjedhjeve presidenciale të 5 nëntorit. Muajin e ardhshëm Presidenti i SHBA pritet të drejtojë një takim virtual të Grupit të Kontaktit për Mbrojtjen e Ukrainës për të koordinuar ndihmën ndërkombëtare për këtë vend.
Ndërsa Zelensky pritet të nxisë objektivin e vendit të tij për t’u anëtarësuar në NATO këtë të enjte, gjatë një takimi në Bruksel me ministrat e mbrojtjes së aleancës ushtarake, synim që e publikoi një ditë më parë kur prezantoi “planin e tij të fitores” ndaj Rusisë para deputetëve të vendit të tij. Ndërkohë shefi i NATO-s Mark Rutte tha se ka ende çështje të vështira që duhen zgjidhur, përpara se Ukraina të anëtarësohet në aleancë.
