SHBA pritet të mbyllë një duzinë misionesh diplomatike në mbarë botën
Departamenti i Shtetit i SHBA po përgatitet të mbyllë në muajt e ardhshëm pothuajse një duzinë konsullatash që janë vendosur kryesisht në Evropën Perëndimore dhe po kërkon të reduktojë fuqinë e tij punëtore në nivel global.
Lajmin e kanë bërë të ditur zyrtarë të shumtë amerikanë, të cilët tregojnë për Reuters se Departamenti i Shtetit po shqyrton gjithashtu bashkimin e mundshëm të një numri të byrove të ekspertëve në selinë e tij në Uashington që po punojnë në fusha të tilla si të drejtat e njeriut, refugjatët, drejtësia penale globale, çështjet e grave dhe përpjekjet për të luftuar trafikimin e qenieve njerëzore.
Reuters raportoi muajin e kaluar se misioneve të SHBA-së në mbarë botën iu kërkua të shqyrtonin zvogëlimin e stafit amerikan me të paktën 10% pasi Trump dhe miliarderi Elon Musk po përpiqen të ulin kostot e fuqisë punëtore federale të SHBA.
Presidenti republikan dëshiron të sigurojë që burokracia e tij të jetë plotësisht në përputhje me axhendën e tij “Amerika së pari”.
Muajin e kaluar ai firmosi një urdhër ekzekutiv për të rinovuar shërbimin e jashtëm të SHBA-së për të siguruar zbatimin “besnik dhe efektiv” të agjendës së tij mbi politikën e jashtme.
Gjatë fushatës së tij elektorale, Trump ishte zotuar vazhdimisht se do të pastronte ‘Deep State’ duke pushuar nga puna burokratët që ai i konsideron të pabesë.
Kritikët thonë se shkurtimet e mundshme në gjurmën diplomatike të SHBA-së së bashku me çmontimin e Agjencisë së SHBA-së për Zhvillim Ndërkombëtar, e cila ofroi ndihma me vlerë miliarda dollarë globalisht, rrezikojnë të minojnë lidershipin amerikan dhe të lënë një vakum të rrezikshëm për kundërshtarët si Kina dhe Rusia.
Trump dhe Musk thonë se qeveria amerikane është shumë e madhe dhe ndihma amerikane e financuar nga taksapaguesit është shpenzuar në një mënyrë të kotë dhe mashtruese.
Leipzig, Hamburg dhe Dusseldorf në Gjermani, Bordeaux, Rennes, Lyon dhe Strasburg në Francë dhe Firence në Itali janë në mesin e listës së konsullatave më të vogla që Departamenti i Shtetit po konsideron mbylljen.
“Departamenti i Shtetit vazhdon të vlerësojë qëndrimin global për të siguruar se jemi në pozicionin më të mirë për të adresuar sfidat moderne në emër të popullit amerikan”, tha një zëdhënës i Departamentit të Shtetit.
