SHBA pritet të njoftojë rikthimin e grupit Houthi në listën e organizatave terroriste

Administrata e Presidentit Biden pritet të njoftojë planet për t’i rikthyer rebelët Houthi në listën e organizatave terroriste, tha një zyrtar amerikan për time.com.

Lëvizja vjen pasi Houthi-t kanë nisur dhjetëra sulme ndaj anijeve tregtare në Detin e Kuq. Grupi thotë se ka sulmuar anijet në përgjigje të operacioneve ushtarake të Izraelit në Gaza pas sulmit të Hamasit në Izrael më 7 tetor.

Sekretari i Shtetit Antony Blinken i hoqi nga lista grupin Houthi si një organizatë të huaj terroriste posaçërisht në shkurt 2021, pasi administrata u përpoq ta bënte më të lehtë importin e ushqimit dhe ndihmat humanitare në Jemen.

Ushtria amerikane ka kryer një seri sulmesh në Jemen, që në shënjestër kanë patur zonat e kontrolluara nga rebelët Houthi, ku janë stacionuar sistemet e lëshimit të raketave balistike, që kanë sulmuar anijet tregtare në Detin e Kuq. Sulmet e rebelëve Houthi kanë ndërprerë transportin detar të mallrave në Detin e Kuq, duke nxitur reagimin e Shteteve të Bashkuara dhe Britanisë.

Milicia Houthi, aleate e Iranit ka kërcënuar me zgjerim të sulmeve në Detin e Kuq, duke përfshirë ato ndaj anijeve amerikane, në përgjigje të sulmeve amerikane dhe britanike ndaj pozicioneve të tyre në Jemen. Rebelët Houthi thonë se sulmet ndaj anijeve tregtare në Detin e Kuq u kryen në përgjigje të sulmit të Izraelit në Rripin e Gazës, që ka shkaktuar vrasjen e mijëra palestinezeve dhe një krizë humanitare. Sulmi i 7 tetorit nga Hamasi në Izrael, në të cilin u vranë 1200 persona dhe u morën peng 240 të tjerë, shkaktoi një përgjigje të fortë ushtarake nga Izraeli.

Menjëherë pasi administrata e Biden mori detyrën, Blinken hoqi emërtimet në një hap që u kritikua ashpër nga ligjvënësit konservatorë dhe të tjerë, por kishte për qëllim të mbante ushqimin, ilaçet dhe ndihmat e tjera shumë të nevojshme në Jemen.

Presidenti amerikan Joe Biden i quajti të premten forcat Houthi të Jemenit një grup “terrorist”, pasi avionët luftarakë, anijet dhe nëndetëset amerikane dhe britanike kryen dhjetëra sulme ajrore në të gjithë Jemenin.

Udhëheqësit e grupit Houthi kanë kërcënuar se do të jetë një “përgjigje të fortë dhe efektive.