Shefi i OKB-së Guterres: I papranueshëm refuzimi që Izraeli i ka bërë zgjidhjes mes dy shteteve në konflikt

Të papranueshëm e ka cilësuar sekretari i përgjithshëm i OKB-së Antoni Guterres refuzimin që qeveria izraelit i ka bërë zgjidhjes me dy shtete të konfliktit me palestienzët, duke theksuar se një qëndrim i tillë do t’i jepte kurajë ekstremistëve kudo në botë.

Në një takim të nivelit të lartë që u mbajt në këshillin e sigurimit të OKB-së në lidhje me lindjen e mesme, Guterres tha se pushtimit të izraelit duhet t’i jepej fund.  Këshilli me 15 anëtarë prej kohësh ka mbështetur idenë e dy shteteve që jetojnë pranë njëri tjetrit brenda kufijve të sigurt dhe të njohur. Palestinezët duan një shtet  që përfshin bregun perëndimor, Jerusalemin Lindor dhe rripin e gazës, territor ky që u mor nga izraelitët në 1967-ën. 

E ndërsa në Gaza lufta mes Izraelit dhe militantëve të Hamas vijon me intensitet, kryeministri izraelit Benjamin Netanjahu u shpreh javën e shkuar se Izraeli duhet të kishte kontrollin e sigurisë të të gjitha tokave në perëndim të lumit Jordan, që përfshin territoret palestineze.  

E gjithë popullsia e gazës po përjeton shkatërrimin në një shkallë dhe shpejtësi që nuk gjen precendent në historinë modern. Asgjë nuk mund të justifikojë ndëshkimin kolektiv të popullit palestinez, theksoi Guterres. 

Në takimin e këshillit të sigurimit foli edhe ministri i jashtëm palestinez, Riyad al-Maliki i cili e akuzoi Netanjahun se kishte vetëm një synim, mbijetesën e tij politike në kurriz të miliona palestienzëve nën pushtimin e paligjshëm izraelit. 

Al-Maliki gjithashtu tha se ishte koha që Shteti I Palestinës të pranohej në OKB.  Që kjo të realizohet duhet që të 15 anëtarët e këshillit të sigurimit, mes të cilëve edhe aleati I izraelit, SHBA që ka të drejtën e vetos si anëtar i përhershëm, të dorëzojnë rekomandimin përkatës pranë asamblesë së përgjithshme me 193 anëtarë.