Shqipëri-Francë/ Nënshkruhet “Marrëveshja e Zbatimit për Forcimin e Bashkëpunimit Policor në Fushën Balistike”

Në vijim të deklaratës së përbashkët të qëllimit të dakordësuar gjatë vizitës së Presidentit Emmanuel Macron në Tiranë para disa javësh, ministri i Brendshëm, Taulant Balla nënshkroi sot me Ambasadoren e Republikës së Francës “Marrëveshjen e Zbatimit për Forcimin e Bashkëpunimit Policor në Fushën Balistike”.

Në këtë bazë të dhënash janë regjistruar armët dhe municionet e sekuestruara nga ana juridike. Shfrytëzimi i informacionit balistik i bazuar në elementët teknikë të armëve dhe municioneve të sekuestruar, mundëson identifikimin e rrjeteve të gjithë trafikut të armëve.

Marrëveshja është hartuar në kuadër të Projektit EVOFINDER për Sistemin e Identifikimit Balistik dhe ky projekt ka nisur gjatë Procesit të Berlinit. 

Franca dhe Gjermania e kanë zbatuar dhe po zbatojnë këtë projekt EVOFINDER për te gjithë vendet e Ballkanit Perëndimor. 

Sistemi është dhuruar në të gjithë vendet e Ballkanit Perëndimor përfshirë dhe Shqipërinë. 

EVOFINDER është sistemi për identifikimin balistik dhe aktualisht funksionon ne Institutin e Policisë Shkencore.

Kjo marrëveshje do të jetë një instrument më tepër në luftën kundër krimit të organizuar, përdorimit të armëve të vogla e të lehta si dhe identifikimit të autorëve të mundshëm pavarësisht vendit ku kryejnë veprën penale.

Marrëveshja parashikon që shërbimet kompetente balistike të të dy vendeve, të shqyrtojnë mënyrat e vendosjes në rrjet të skedarëve të tyre kombëtar të identifikimit balistik, njëherësh duke zbatuar procedura që garantojnë besueshmërinë dhe cilësinë e të dhënave të shkëmbyera.