“Shqipëria brenda 2030 në BE”, Rama për “La Razon”: Trump bekim për Evropën
Në një intervistë për median spanjolle ‘La Razon’ kryeministri, Edi Rama pohoi se nëse gjerat shkojnë sipas planit, në 2030-ën, Shqipëria do të bëhet një anëtare e re e Bashkimit Evropian.
“Negociatat po ndjekin kursin e përcaktuar në udhërrëfyes, i cili është i njëjtë për të gjitha vendet. Ju thjesht duhet të bëni detyrat e shtëpisë tuaj dhe të miratoni organin e ligjit evropian në legjislacionin tuaj dhe, nga ana tjetër, të demonstroni aftësinë për ta zbatuar atë. Për sa i përket afatit kohor, plani që kemi ndarë me Komisionin Evropian është që deri në fund të vitit 2027 të përmbyllim të gjithë pjesën teknike dhe më pas të trajtojmë pjesën politike, duke përfunduar me ratifikimin nga parlamentet kombëtare. Pra, nëse gjithçka shkon sipas planit, viti 2030 do të jetë viti që Shqipëria do të bëhet një anëtare e re e Bashkimit Evropian”, tha Rama.
Kryeministri shpjegoi dhe si do rriten shpenzimet e mbrojtjes tani që Trump kërkon më shumë para nga anëtarët e NATO-s, pjesë e së cilës është edhe Shqipëria.
“Si të gjitha vendet, do ta bëjmë pak nga pak. Aktualisht jemi mbi 2% të shpenzimeve të mbrojtjes në raport me PBB-në kombëtare, kështu që tashmë jemi në përputhje me NATO-n. Tani, është e qartë se do të vendoset një objektiv i ri dhe ne do të bëjmë pjesën tonë si gjithë të tjerët”, theksoi kreu i qeverisë.
Rama shtoi më tej se presidenti, Donald Trump mund të jetë një bekim për Evropën pasi mund ta zgjojë dhe ta bëjë një fuqi të madhe.
“Donald Trump thotë se Zoti e shpëtoi nga pushkatimi për ta bërë Amerikën sërish të madhe. Dhe jam shumë i lumtur që Zoti e bëri këtë. Shtoj se Zoti e shpëtoi Donald Trumpin për të zgjuar Evropën. Pra, nëse është kështu, Trump është një bekim për Evropën në kuptimin që Evropa ka çdo arsye të zgjohet dhe të ndryshojë dhe të bëhet shumë më e vetëdijshme – se nevoja për ndryshim nuk mund të shtyhet çdo vit – pasi përndryshe Evropa do të jetë më pak e rëndësishme. Evropa mund dhe duhet të jetë një fuqi e madhe, dhe për ta bërë këtë duhet të ndryshojë dhe të bëhet e vetëmjaftueshme”, tha Rama.
Edi Rama, kryeministër i Shqipërisë që nga viti 2013, ka prezantuar edicionin e 30-të të Kongresit Botëror të Drejtësisë në Madrid ku gjeti rastin për të shpjeguar pse Shqipëria është “vendi i mundësive”, me njerëz mikpritës, të sigurt dhe të bukur si Spanja, por shumë më lirë.
