Shtëpia e Bardhë: Biden dhe Netanjahu diskutojnë objektivat dhe fazat e luftës

Shtëpia e Bardhë ka bërë të ditur se presidenti i SHBA Joe Biden ka biseduar me kryeministrin izraelit Benjamin Netanjahu për të diskutuar zhvillimet e fundit në Izrael dhe Gaza.

Sipas Shtëpisë së Bardhë, Biden dhe Netanjahu diskutuan mbi objektivat dhe fazat e luftës Izrael-Hamas.

“Udhëheqësit diskutuan fushatën ushtarake të Izraelit në Gaza për të përfshirë objektivat dhe fazat e saj. Presidenti theksoi nevojën kritike për të mbrojtur popullatën civile, përfshirë ata që mbështesin operacionin e ndihmës humanitare, dhe rëndësinë e lejimit të civilëve që të largohen të sigurt nga zonat e luftimeve të vazhdueshme”, thuhet në deklaratën e Shtëpisë së Bardhë.

Dy liderët botërorë diskutuan gjithashtu pengjet që mbeten në robërinë e Hamasit dhe “rëndësinë” e sigurimit të lirimit të tyre.

Biden u tha gazetarëve se ai nuk bëri presion për një armëpushim gjatë bisedës telefonike.

“Unë nuk kërkova një armëpushim”, tha Biden ndërsa u largua nga Shtëpia e Bardhë të shtunën pasdite. “

Kam pasur një bisedë të gjatë me Netanyahun sot, dhe kjo është një bisedë private”, ka theksuar Biden.

Nga ana e tij, Netanjahu shprehu vlerësimin e tij për pozicionin e SHBA-së në Këshillin e Sigurimit të Kombeve të Bashkuara, sipas një deklarate nga lideri izraelit në X.

“Kryeministri e bëri të qartë se Izraeli do të vazhdojë luftën derisa të arrihen të gjitha qëllimet e tij”, thuhet në deklaratën e zyrës së kryeministrit Netanjahu. Kjo ishte biseda e 17-të mes dy liderëve që nga 7 tetori.

Këshilli i Sigurimit i Kombeve të Bashkuara miratoi të premten një rezolutë që bën thirrje për pauza humanitare midis Izraelit dhe Hamasit, rritje të ndihmës për Gazën dhe krijimin e kushteve që do të lejojnë një fund të qëndrueshëm të luftimeve, duke i dhënë fund ditëve të negociatave me dyer të mbyllura.