Siguria e Evropës dhe e Ballkanit, Blinken viziton Brukselin dhe Shkupin

Sekretari i Shtetit Antony J. Blinken do të vizitojë sot Brukselin ku do të marrë pjesë në Takimin e Ministrave të Jashtëm të Aleancës së Atlantikut të Veriut duke përfshirë takimin e parë të ministrave të jashtëm të Këshillit NATO-Ukrainë.

Sekretari Blinken pritet të nënvizojë angazhimin e palëkundur të Aleancës së Atlantikut të Veriut ndaj Ukrainës në luftën e saj kundër agresionit rus.

Ai do të theksojë mbështetjen tonë për demokracinë dhe stabilitetin rajonal në Ballkanin Perëndimor dhe do të diskutojë prioritetet për Samitin e Uashingtonit në korrik 2024, shkruhet në njoftimin e Departamentit të Shtetit.  

Gjithashtu, Blinken pritet të vizitojë Maqedoninë e Veriut, ku do të marrë pjesë në një darkë joformale në Këshillin Ministror të shteteve anëtare të Organizatës për Siguri dhe Bashkëpunim në Evropë (OSBE), që mbahet në Shkup më 30 nëntor dhe 1 dhjetor.

Ministri i Jashtëm i Maqedonisë së Veriut, Bujar Osmani theksoi se është paralajmëruar edhe pjesëmarrja e një delegacioni rus, ku do të duhet të jetë edhe ministri i Jashtëm i Rusisë, Sergej Lavrov. Por, për ardhjen e tij të mundshme ende nuk ka konfirmim zyrtar.

 “Sigurisht që nuk duhet të presim që të gjithë të qëndrojnë për tri ditë. Këta janë njerëz të rëndësishëm që do të vijnë në një pjesë të ngjarjes dhe do të largohen. Se a do të përkojnë datat e qëndrimit të tyre, nuk mund të them, sepse ende jemi duke i përcaktuar ato”, tha Osmani në konferencën për media.

Osmani është shprehur se Lavrovi i kishte dërguar një letër në fillim të nëntorit në të cilën, “ka treguar interes dhe kërkesë për të siguruar praninë e tij në Shkup”.

Para disa ditësh, Osmani tha se kërkesat për viza të delegacionit rus janë duke u proceduar dhe sapo të ketë informacione, opinioni do të informohet.

“Vendimi për sanksionet e Bashkimit Evropian nuk vlen për ngjarjet e natyrës shumëpalëshe siç është OSBE-ja, prandaj është vendim i qeverive që duhet ta sjellin, por ka një bazë ligjore në BE. Tani, ne dhe të paktën një nga vendet tona fqinje duhet të marrim një vendim të tillë. Bullgaria apo Greqia për të mundësuar një fluturim të tillë”, tha ministri i Punëve të Jashtme, Bujar Osmani, më 15 nëntor.