Siri- Rebelët përparojnë, mijëra persona largohen nga qyteti Homs

Dhjetëra mijëra njerëz po largohen nga qyteti i tretë më i madh i Sirisë, Homs, nga frika se rebelët e udhëhequr nga islamistët do të vazhdojnë të përparojnë drejt kryeqytetit, Damaskut.

Udhëheqësi i grupit militant islamist Hayat Tahrir al-Sham (HTS), Abu Mohammed al-Jawlani, u tha banorëve të Homsit se “koha juaj ka ardhur”.

Rebelët sirianë nisën një ofensivë të papritur kundër qeverisë javën e kaluar dhe deri tani kanë kapur dy qytete të mëdha. Ata kanë përparuar në jug dhe Homs është qyteti tjetër në rrugën nga Halepi për në Damask.

Observatori Sirian për të Drejtat e Njeriut (SOHR), një grup mbikëqyrës me qendër në Mbretërinë e Bashkuar, po raporton se avionët luftarakë kanë synuar një urë në një rrugë që lidh Homsin dhe Hama-n për t’u përpjekur të ngadalësojnë përparimin e rebelëve.

Pasi ushtria siriane humbi kontrollin e Hama-s pas ditëve të luftimeve, nuk është e qartë nëse do të jetë në gjendje të mbrojë Homsin.

Më shumë se gjysmë milioni njerëz janë vrarë që nga shpërthimi i një lufte civile në vitin 2011, pasi qeveria e Asadit goditi dhunshëm protestat paqësore pro-demokracisë.

Ofensiva rebele e cila filloi nëntë ditë më parë është përparimi më i shpejtë që nga lufta civile. Presidenti Asad është zotuar të “shtypë” rebelët dhe ka akuzuar fuqitë perëndimore se po përpiqen të rivizitojnë hartën e rajonit, ndërsa aleatët e tij kryesorë, Rusia dhe Irani kanë ofruar “mbështetjen e tyre të pakushtëzuar”.

Në të kaluarën, Presidenti Asad u mbështet te Rusia dhe Irani për të shtypur kundërshtarët e tij./ BBC