Situata nga reshjet në vend, Peleshi: Po zhbllokojmë akset rrugore

Ministri i Mbrojtjes Niko Peleshi ka bërë të ditur se megjithëse reshjet e shiut kanë vijuar pothuaj në të gjithë territorin e vendit gjatë natës dhe gjatë ditës së sotme situata paraqitet normale në pjesën më të madhe të qarqeve.

Peleshi thekson se ekipet e emergjencave kanë punuar në terren për të garantuar qarkullimin pa vështirësi të qytetarëve dhe automjeteve.

“Ekipet e emergjencave, koordinuar nga Agjencia Kombëtare e Mbrojtjes Civile, punonjës të drejtorive vendore të rrugëve, zjarrfikëses dhe policisë kanë punuar në terren për të garantuar qarkullimin pa vështirësi të qytetarëve dhe automjeteve.

Në Tiranë situata është përmirësuar, krahasuar me një ditë më parë”, shkruan Peleshi në rrjetin social në Facebook.

Peleshi shpjegon se po punohet në segmentet rrugore të Tepelenës për t’i zhbllokuar nga internetet.

“Po punohet në segmentin rrugor Bënçë-Lekdush, në vendin e quajtur “Uji i Varur”, bashkia Tepelenë, në aksin rrugor Picar- Golem, për zhbllokimin e rrugëve nga inertet.

Një grup prej 23 turistësh të huaj u evakuuan pa probleme, pasi u bllokuan në hyrje të kanionit të Langaricës për shkak të prurjeve të shumta të lumit”, thekson ministri Peleshi.

Ndërkaq, ai shton se “në disa akse rrugore në Shkodër, Dibër, Elbasan, Berat e Korçë po punohet për pastrimin e rrugëve. Ndërsa ekipet e OSHEEE po mundësojnë rilidhjen e energjisë në disa zona të thella të Gjirokastrës, Vlorës, Beratit, Fierit, Korçës, Dibrës e Elbasanit”.