Skema Kombëtare e Mbështetjes 2023, përfitojnë 12 mijë blegtorë 12 mijë blegto…

Skema Kombëtare e Mbështetjes 2023, përfitojnë 12 mijë blegtorë

12 mijë blegtorë shqiptarë do të përfitojnë nga skema kombëtare e mbështetjes për vitin 2023.

Ministrja e Bujqësisë dhe UShqimit Frida Krifca, vizitoi një stan malor në Malin e Çajupit, në Libohovë.

Ky stan u mbështet nga qeveria, me instalimin e paneleve diellore për energji si dhe vendosjen e një rezervuari ftohës, i cili garanton ruajtjen e qumështit deri tek pikat e grumbullimit.

“Kemi zgjedhur disa stane të tillë për t’i mundësuar infrastrukturën energjitike që i mungonte duke instaluar panele fotovoltaikë, inverter si dhe infrastrukturë ruajtëse me tanker ftohës çka i mundëson këtij stani por dhe disa blegtorëve përreth që ta grumbullojnë e ta ruajnë qumështin në tankerin ftohës që merr energji nga panelet” tha ministrja.

Zonja Krifca u shpreh se fokusi i mbështetjes qeveritare është zhvillimi i një blegtorie të qëndrueshme, edhe përmes aktiviteteve të tjera që nxisin agroturizmin.

“Më tej do të punojmë për mbështetjen në përpunimin e qumështit dhe certifikimin e produktit drejt e nga stani. Këtë model po punojmë ta shtrijmë me Institutin Francez të Blegtorisë edhe në zona të tjera duke mbështetur zhvillimin e mëtejshëm të blegtorisë së imët e të qëndrueshme, duke adresuar problematikat e vërteta të këtyre sistemeve të prodhimit e duke ruajtuar këtë trashëgimi e pasuri të kombit tonë” tha zonja Krifca.

Qeveria shqiptare mbështet në këtë nismë bashkë me Institutin Francez për Blegtorinë, duke synuar që kjo të shtrihet edhe në zona të tjera të vendit.

Disa staneve do t’u mundësohet infrastruktura energjitike me vendosjen e paneleve diellore, por edhe paisjeve për përpunimin e qumështit.

Burimi