Smogu në Pakistan fotografohet nga hapësira

Në fillim, ju nuk mund ta shihni smogun, por mund ta nuhasni atë. Ka erë sikur diçka po digjet dhe intensifikohet me uljen e temperaturës. Pastaj tymi dhe mjegulla fillojnë të mbështjellin qytetin dhe tashmë njerëzit jo vetëm e shohin, por ecin nëpër tymin që nuk i lë të shohin më shumës e disa metra më tutje.

Lahor, qyteti më i madh i provincës pakistaneze të Punjabit, po përballet me një smog vdekjeprurës për 13 milionë banorët e saj. Indeksi i cilësisë së ajrit ka kaluar shifrën 1000 AQI këtë muaj, ku çdo shifër mbi 300 AQI konsiderohet e rrezikshme.

Pakistani po përballet me një cilësi tepër të ndotur të ajrit, edhe pse autoritetet po mundohen të marrin masa ndaj kësaj krize. Smogu është aq i lartë sa është fotografuar edhe nga hapësira. Imazhet satelitore nga agjencia amerikane e hapësirës NASA tregojnë shtresën e trashë të smogut dhe përqendrimet e shumta të zjarrit në rajonin midis kryeqytetit Indian, Delhi, dhe Lahore të Pakistanit.

Shkollat dhe disa biznese ​​janë mbyllur, njerëzve u është thënë të qëndrojnë në shtëpi si dhe është kufizuar qarkullimi i automjeteve.  

Një shkak kryesor i smogut janë zjarret që shkaktohen nga djegia e kashtës pas korrjes nga fermerët në Pakistan dhe Indi. Megjithatë sipas autoriteteve pakistaneze për mbrojtjen e mjedisit, rreth 30% e smogut të Lahores vjen nga përtej kufirit në Indi.  

Por pjesa më e madhe e ndotjes së ajrit në Lahore vjen nga pesë milionë motoçikletat e saj dhe miliona gazra të automjeteve të tjera, industritë në periferi të qytetit, si furrat e tullave me qymyr, duke shtuar edhe më shumë ndotje në ajër.