Sot seanca maratonë për buxhetin! Rithemelimi paralajmëron bllokimin. PS gati skenarët për të miratuar buxhetin

Kuvendi i Shqipërisë ka njoftuar sot se do të mblidhet seanca maratonë kur pritet miratimi i buxhetit për  vitin e ardhshëm 2024.

Ndërkohë, deputetët e Rithemelimit kanë paralajmëruar bllokimin e seancës maratonë.

Duke marr shkas nga mënyra e zhvillimit të seancave të mëparshme, mësohet se mazhoranca ka menduar disa skenarë sesi të vijojë seancën. Burimet thonë se socialistët mund ta kalojnë pa diskutime, por nuk përjashtohet as mundësia e një seance online.

Gjithashtu mësohet se në rast se opozita vendos të ngujohet në sallën e Parlamentit, ekziston mundësia që seanca të zhvendoset në ambientet e Kryesisë së Kuvendit.

PD nga ana e saj këmbëngul për ngritjen e komisioneve hetimore. Ndaj demokratët do të vazhdojnë bllokadën edhe në seancën e sotme plenare.

Në mbledhjen e Grupit të Rithemelimit, ish-Kryeministri, Sali Berisha, nuk zbuloi detaje mbi metodat që do të ndërmarrin për të mos lënë shumicën që të vazhdojë rrjedhën normale të parlamentit, por deklaroi se ,”përfaqësuesit e popullit opozitar ditën e hënën (20 nëntor) do të kenë betejën e tyre pa kthim, me guxim, vendosmëri do të mbrojnë fuqishëm dhe të pamposhtur pluralizmin politik.

Sipas Berishës , “ky është parlamenti i diktaturës! Edi Rama është i tmerruar nga mosbindja civile e deputetëve të opozitës. Ai ka urdhërua forcat speciale të gardës, policisë, RENEA-n që të shtypin ditën e hënë revoltën e deputetëve të opozitës që protestojnë për të drejtat kushtetuese të popullit opozitar dhe përfaqësuesve të tij në parlament”.

Ndërkohë vazhdojnë të këmbëngulin se kërkesat e tyre për ngritjen e komisioneve hetimore, ndryshe nga çfarë thotë shumica, janë të drejta.

Ditën e shtunë Gazment Bardhi publikoi një foto, ku sipas tij është dhënë urdhër që Garda të bllokojë sallën e seancave parlamentare, duke mos lejuar demokratët që të zbatojnë skenarin e përmbysjes së karrigeve.

“Sot jemi njohur me urdhrin e paligjshëm të Lindita Nikollës për të rrethuar të hënën sallën e seancave plenare me forcat speciale të Gardës së Republikës, duke shpallur kështu zyrtarisht shtetin personal autokrat të Edi Ramës. Siç shihet edhe në foton bashkëlidhur Garda e Republikës është urdhëruar të bëjë “provat” gjatë ditës së sotme sesi do të rrethojnë deputetët e opozitës gjatë seancës plenare të së hënës!”, – deklaroi kreu I deputetëve demokratë.

Ndërkohë pretendimet e Gazment Bardhi i hodhi poshtë Kuvendi, i cili në një reagim tha se kryetarja e Kuvendit, Lindita Nikolla nuk ka urdhëruar asnjë plan të veçante. Bardhi reagoi sërish duke thënë se lajmi i shpërndarë nga Kuvendi është i rremë duke i qëndruar sërish versionit të tij.

Kujtojmë që gjatë javëve që kemi lënë pas opozita nuk ka lejuar as zhvillimin e komisioneve parlamentare, çka ka detyruar mazhorancën që të vërë në zbatim planin B, atë të mbledhjeve ‘online’. Por në rastin e seancës maratonë për buxhetin nuk dihet se si do të veprojë qeveria në rast bllokimi.