Sot Shqipëri-Spanjë, Rama: Kombëtarja jonë e re do të dalë me kokën lart

Kryeministri Rama ka mbështetur ekipin e kombëtares e cila luan ditën sotme (24 qershor)në kundër Spanjës. Në një postim në rrjetin e tij social Facebook, Rama thekson se pavarësisht vështirësive që ekipi u ndesh me skuadra të forta të cilat njihen dhe si “grupi i vdekjes” Shqipëria ja doli të ishte në lojë. Për më tepër Rama shkruan se në një përballje me skuadrën më të fortë, ekipi nuk asgjë për të humbur po vetëm duhet të luajnë e ta shijojnë deri në fund këtë moment magjik.

“Askush nuk do ta besonte me mendje – me zemër tjetër punë – që në ndeshjen e tretë të grupit në EURO2024, Shqipëria do të ishte ende në lojë e që ndërkohë do të ishte e treta, jo e fundit në atë që është quajtur botërisht si “grupi i vdekjes”.

Eksperienca shumë më e madhe e rivalëve në dy ndeshjet e para bëri të sajën kundër nesh, se përndryshe pozicioni ynë sot mund të kishte qenë edhe më i favorshëm. Po ky është futbolli dhe çdo pishman i sotëm është eksperiencë për të nesërmen.

Sot përballemi me skuadrën më të frikshme të grupit në një mision që në letër është 100% i pamundur. Por topi është i rrumbullakët dhe në darkë të 12 lojtarët kuqezinj, ata në fushë dhe lojtari ynë i 12-të në shkallët e stadiumit, një ndër më fantastikët e këtij Europiani, nuk kanë absolutisht asgjë për të humbur, po vetëm duhet të luajnë e ta shijojnë deri në fund këtë moment magjik që kanë krijuar vetë.

Cilidoqoftë rezultati i ndeshjes me Spanjën, Kombëtarja jonë e re do të dalë me kokën lart e me një eksperiencë shumë të çmuar në nivelet më të larta sportive, e cila do t’i shërbejë që të rritet, të fitojë besimin dhe personalitetin e domosdoshëm për t’u përballur me sukses në sfidat e këtyre niveleve, duke na dhuruar të tjera kënaqësi të veçanta si kjo e EURO2024-ës”, ka shkruar Rama.