SPAK përfundon hetimet: Ish-punonjësi i Agjencisë së Trajtimit të Pronave mori ryshfet në këmbim të kompensimeve

Prokuroria e Posaçme (SPAK) ka përfunduar hetimet për ish-punonjësin e Agjencisë së Trajtimit të Pronave, Ilir Kapetani dhe e ka çuar për gjykim nën akuzën e korrupsionit.

Nga hetimet ka rezultuar se Kapetani, Specialist  i Shqyrtimit të Dosjeve pranë Agjencisë së Trajtimit të Pronave, ka marrë ryshfete nga qytetarë të ndryshëm dhe nga trashëgimtarë të ish pronarëve, në këmbim të premtimit për të siguruar kompensimin financiar, gjatë trajtimit të kërkesave të tyre për kthimin dhe kompensimin e pronës.

Sipas SPAK, Kapetani ka kryer 22 raste korrupsioni.

Ndërkohë, të pandehurit D.L., A.G., D.D., V.Z., I.L., XH.V., G.T., L.A., J.Z., A.H., V.B., I.K., R.M., L.B., M.I., Y.N. dhe M.SH, të cilët janë personat që kanë dhënë ryshfetin, janë akuzuar se kanë kryer veprën penale “Korrupsioni aktiv i personave që ushtrojnë funksione publike”.