“Stacioni rozë“ në RTSH/ Emisioni më i ri me lajme nga bota e spektaklit, çdo ditë në 12:30

Nis të hënën në ekranin e RadioTelevizionit Shqiptar emisioni më i ri, “Stacioni Rozë“.

Ashtu si dhe emri i tij, ky format i ri do të ketë karakter rozë, pasi do të përfshijë lajme nga bota e spektaklit, të ftuarit në studio, si dhe intervistat ekskluzive me personazhe të njohur të botës së artit.

“Kemi për qëllim të sjellim lajmet më të fundit, të rejat, të zbulojmë sekrete rreth vip-ve. Gjithashtu do të kemi edhe të ftuar shumë personazhe ‘in’ të momentit të cilët do të na rrëfejnë për jetën e tyre personale dhe profesionale. Do të kemi të ftuar në panelin tonë ku do të diskutojnë rreth temave sociale, stilit të jetës, tabutë, pra do të ndezim disa debate,” tha moderatorja Krisa Çaushi.

“Stacioni rozë“ do të transmetohet nga e hëna në të premte nën moderimin e Çaushit.

”Do të japim sugjerime filmash dhe videot e ditës. Kemi menduar të rikthehemi pak në kohë, t’i bëjmë njerëzit nolstagjikë me këngët e vjetra. Është një fashë orari 12:30-13:00 që i përshtatet të gjitha grup moshave dhe qëllimi ynë është që të kënaqim teleshikuesit,” tha moderatorja.

Formati i ri , i cili është ideuar të zgjasë 30 minuta do të jetë i pasur me informacione, materiale të përgatitura nga bota e spektaklit dhe shumë surpriza, të cilat do të mund t’i zbuloni çdo ditë në ekranin e RTSH-së.