Stoltenberg: NATO, në diskutime për aktivizimin e armëve bërthamore kundër kërcënimeve Rusi-Kinë

NATO po diskuton “aktivizimin” e armëve të saj bërthamore me vendet e Aleancës për shkak të kërcënimit në rritje nga Rusia dhe Kina.

Sekretari i NATO-s, Jens Stoltenberg, e bëri deklaratën për gazetën britanike Telegraph, ku tha se është në bisedime për të zhvilluar më shumë armë bërthamore duke i nxjerrë nga magazinimi dhe duke i bërë gati.

Siç tha Jens Stoltenberg, do të ketë konsultime mes anëtarëve të aleancës për transparencë rreth përdorimit të arsenalit të tyre bërthamor si parandalues.

“Unë nuk do të hyj në detaje operacionale se sa koka bërthamore duhet të jenë funksionale dhe sa duhet të ruhen, por ne duhet të konsultohemi për këto çështje. Pikërisht këtë po bëjmë”, tha ai.

“Transparenca ndihmon për të komunikuar mesazhin e menjëhershëm se ne jemi, natyrisht, një aleancë bërthamore. Synimi i NATO-s është një botë pa armë bërthamore, por për sa kohë të ekzistojnë armët bërthamore, ne do të mbetemi një aleancë bërthamore, sepse një botë ku Rusia, Kina dhe Koreja e Veriut kanë armë bërthamore dhe NATO nuk ka, është një botë më e rrezikshme”, komentoi ai.

Siç tha Stoltenberg javën e kaluar, armët bërthamore janë “garancia përfundimtare e sigurisë” e NATO-s dhe një mjet për të ruajtur paqen.

Presidenti rus Vladimir Putin ka paralajmëruar vazhdimisht se Moska mund të përdorë armë bërthamore për të mbrojtur veten në rrethana ekstreme. Ai akuzon SHBA-në dhe aleatët e saj evropianë se po e shtyjnë botën në prag të konfliktit bërthamor duke i dhënë Ukrainës miliarda dollarë armë, disa prej të cilave po përdoren kundër tokës ruse.

NATO, e cila ka marrë një rol më të madh në koordinimin e furnizimeve me armë në Kiev, rrallë flet për armë në publik, megjithëse SHBA-të dihet se kanë vendosur bomba bërthamore në disa vende në Evropë./ CNN.gr