Studentët e Mjekësisë rikthehen në auditore pas protestave

Studentët e Fakultetit të Mjekësisë pas më shumë se një muaji bojkot do të rikthehen në auditore.

Ky vendim i tyre erdhi pas takimit të zhvilluar sot me rektorin e Universitetit të Mjekësisë, Arben Gjata, i cili u ka pohuar se do t’i mbështesë deri në daljen e vendimit të Gjykatës Kushtetuese për ligjin që i detyron të punojnë me 5 vite në Shqipëri pas përfundimit të studimeve.

“Në takimin e sotëm ne morëm garanci nga rektori ku na thotë se do e zgjidhim në mënyrën më të mirë që mos të ketë asnjë pengesë për studentët deri në daljen e një vendimi nga Gjykata Kushtetuese. Do të kthehemi të qetë në mësim, por nëse ky premtim do të shkelet do t’i kthehemi sërish protestave”, tha një student për mediet.

Studenti u shpreh se “që nesër do kthehemi sërish në auditorë”.

Prej gati 4 javësh studentët e Mjekësisë kanë zhvilluar një sërë protestash ku kanë kundërshtuar ligjin që i detyron të punojnë me 5 vite në Shqipëri pas përfundimit të studimeve.

Në 6 korrik, Kuvendi i Shqipërisë miratoi projektligjin për “Trajtimin e veçantë të studentëve që ndjekin programin e integruar të studimit të ciklit të dytë “Mjekësi e përgjithshme” në institucionet publike të arsimit të lartë”.

Përmes tij qeveria vendosi detyrimin për studentët e mjekësisë të punojnë të paktën 2-5 vite pas diplomimit në Shqipëri, ose në të kundërt të paguajnë një tarifë që përkon me koston për arsimimin e tyre.

Bordi i administrimit vendosi që çdo student i mjekësisë që nuk përmbush detyrimin ligjor, për të ofruar shërbim shëndetësor nga 3 deri në 5 vite në vendin e tij, do të duhet të paguajë një tarifë prej 240 mijë lekë të reja për çdo vit studimi. Nëse një vit studimi ka kosto 240 mijë lekë, për 6 vite studentët duhet të paguajnë 1.440.000 lekë.