Sulmet izraelite në Rafah, dhjetëra të vrarë e të plagosur nga shpërthimi në një kamp refugjatësh
Hamasi tha se një sulm ajror izraelit kishte goditur një kamp ku strehoheshin palestinezët e zhvendosur në veri-perëndim të Rafahut, në një zonë të sigurt humanitare që nuk kishte lidhje me operacionet të fundit ushtarake të Izraelit.
Ministria e shëndetësisë e drejtuar nga grupi militant palestinez tha se 35 njerëz ishin vrarë dhe dhjetëra të tjerë u plagosën. Në një deklaratë ushtria izraelite tha se kishte shënjestruar militantët e Hamasit dhe kishte eliminuar dy figura të larta të grupit të armatosur. Ajo shtoi se po verifikone sulmin që kishte prekur edhe civilët në veri-perëndim të Rafahut, por theksoi se kishte përdorur armë precize kundër objektivave legjitime terroriste .
Shoqata e Gjysmëhënës së Kuqe Palestineze tha se numri i viktimave ka gjasa të rritet ndërsa operacionet e kërkim-shpëtimit vazhdojnë. Më herët të dielën, sirenat e sulmit ajror u dëgjuan rreth Tel Avivit , ndërsa Hamasi sulmoi Izraelin qendror me raketa të lëshuara nga Rafahu. Tetë raketat u kapën nga sistemet e mbrojtjes ajrore izralite.
Krahu ushtarak i Hamasit tha se kishte vepruar në përgjigje ntë masakrës ndaj civilëve në Gaza. Sulmet e fundit u kryen përpara mbajtjes së bisedimeve të armëpushimit, të cilat pritet të rifillojnë këtë javë. Izraeli filloi sulmet në Rafah në fillim të muajit me qëllim shkatërrimin e Hamasit, ndërsa beson se pengjet izraelitë po mbahen gjithashtu në atë qytet. Fushata ushtarake në Gaza nisi pasi Hamasi sulmoi Izraelin më 7 tetor dhe që atëherë rreth 36 mijë palestinezë janë vrarë në luftë, sipas ministrisë së shëndetësisë të Hamasit të Gazës.
