Sulo: Pas Berishës dhe Metës pres ndëshkimin e Edi Ramës
Gazetari Arion Sulo ka deklaruar në emisionin “3D” të Alban Dudushit në RTSH1 se pas ish-kryeministrit Berisha dhe ish-presidentit Ilir Meta, ai pret ndëshkimin e kreut të qeverisë, Edi Rama.
Ai vuri në dukje se në këtë drejtim, SPAK ka pasur dhe ka mbështetjen e amerikanëve.
“Këtë fuqi që ka SPAK-u për të bërë këto goditje e ka nga mbështetja amerikane. Pas ngritjes së stekës që bëri SPAK me Berishën dhe Metën, jo më kot thashë që nuk kemi pasur prokurori më të mbrojtur. Atëherë këta nuk kanë ndonjë problem se ku godasin, pasi kanë mbështetjen e amerikanëve, presioni duhet thënë”, tha Sulo.
Ai vuri në dukje se lufta ndaj korrupsionit të zyrtarëve të lartë duhet të ngulitë te njerëzit dhe opinioni publik se më në fund është ndëshkuar pandëshkueshmëria. Ndërsa shtoi se pas Berishës dhe Metës, vetëm Edi Ramën pret që të ndëshkohet nga SPAK-u.
“Për mua çfarë po ndodh? Përfshij amerikanët që kanë vendosur një ekuilibër jo të saktë, kanë dëmtuar demokracinë me presionin që kanë bërë. Pas Berishës dhe Metës, unë nuk pres më. Pres vetëm Ramën, jo vetëm unë por edhe publiku. Ka një sens drejtësie. Nuk ka nevojë të njohë reformën në drejtësi në themel, por kam nevojë që unë shikoj për drejtësinë që unë mendova se do të ndëshkonte pandëshkueshmërinë”, u shpreh Sulo.
