Sunak fiton “betejën” me emigrantët, parlamentin britanik voton projektligjin e ri. Ruanda “tashmë” është vend i sigurt

Me 313 vota pro dhe 269 kundër, parlamenti britanik votoi projektligjin e ri të propozuar nga kryeministri Rishi Sunak, që do të bëjë të mundur dërgimin në Ruandë të emigrantëve që mbërrijnë në mënyrë ilegale në Mbretërinë e Bashkuar.  “Populli britanik duhet të vendosë se kush do të vijë në këtë vend,  jo bandat kriminale apo gjykatat e huaja. Kjo është ajo që jep ky projektligj.

Tani do të punojmë për të nisur fluturimet për në Ruandë dhe të ndalojmë anijet”- shkruajti ai në një postim pas votimit projektligjit. Miratimi i tij vjen një muaj pasi, Gjykata e Lartë e shpalli të paligjshme marrëveshjen.

Ajo arsyetoi se marrëveshja për emigrantët mund të çonte në shkelje të të drejtave të njeriut, pasi Ruanda nuk ishte një vend i sigurt për të dërguar azilkërkues. Miratimi i projektligjit është një fitore e rëndësishëme për Sunak, pasi “ndalimin e varkave” me emigrantë, ai e bëri një nga pesë pikat kyçe të qeverisjes së tij.

Britania po shpenzon aktualisht mbi 3 miliardë paundë në vit për përpunimin e kërkesave për azil, me kostot për strehimin e emigrantëve që presin një vendim në hotele dhe objekte të tjera, që shkojnë në rreth 8 milionë paundë në ditë.