Superliga e  volejbollit meshkuj/ Vllaznia likujdon edhe Studentin, kryeson kampionatin me pikë të plota

Dy ndeshje, dy fitore. Ky është bilanci i ekipit të volejbollit Vllaznia për meshkuj në dy javët e para të kampionatit. Pas fitores 3 me 1 të realizuar një javë më herët në transfertën korçare ndaj Skënderbeut vendas, ka ardhur edhe fitorja tjetër ndaj Studentit. Ndeshja e luajtur në pallatin e sportit “ Qazim Dervishi” të Shkodrës, ishte e dominuar plotësisht nga Vllaznia, e cila duke fituar të tre setet, 25-16 të parin, 27-25 të dytin dhe 25-10 të tretin e fitoi të gjithë ndeshjen me rezultatin 3 me 0. Për trajnerin Artan Kalaja, ky është një fillim shumë premtues, pasi skuadra e drejtuar prej tij po shprehet mjaft mirë në fushën e lojës

Ndeshjen në fjalë e ka ndjekur prej së afërmi edhe presidenti i Vllaznisë në volej meshkuj, Aleksandër Leqejza, i cili pas më shumë se dy viteve në postin që mban, jep prononcimin e parë të tij për median.

Ndeshjen e ardhshme, e vlefshme për javën e tretë të kampionatit, Vllaznia do ta luajë në transfertë me Erzenin e Shijakut.