Superliga U-17 Vllaznia “paqe” me Teutën/ Trajneri Çaku, i kënaqur me skuadrën, optimist për fazën finale

Vllaznia U17 ka barazuar me rezultatin 1 me 1 ndaj Teutës, ndeshje kjo e vlefshme për javën e parafundit të fazës së dytë. Pas pjesës së parë e mbyllur 0 me 0, 3 minuta nga fillimi i të dytës, një gabim i portjerit ndëshkon Vllazninë me gol. Në vazhdim, kuqeblutë 17 vjeçarë të drejtuar nga trajneri Ersi Çaku ushtrojnë presion në portën kundërshtare dhe në minutën e 68-të barazojnë me një aksion model që finalizohet me kokë nga Mateas Uldedaj. Edhe pse rastet për gol në vijim ishin të shumta nga Vllaznia, e gjithë ndeshja mbyllet në barazim 1-1.Sa i përket renditjes, Vllaznia U17 vazhdon të jetë mes më të mirave duke synuar fazën finale.Ndeshja e ardhshme, që është edhe e fundit për fazën e dytë, Vllaznia U17 do ta luajë në transfertë me Tiranën.