Superliga  U21, fitorja e tretë për Vllazninë / Vendos dopieta e Zahit, me nga një gol në secilën pjesë

21 vjeçarët e Vllaznisë u përballen mesditën e sotme me ekipin e Vorës. Ndeshja e zhvilluar në stadiumin “Reshit Rusi” të Shkodrës ka përfunduar me rezultatin 2 me 0 në favor të ekipit kuqeblu. Për tre pikëshin e skuadrës shkodrane ka menduar Zahi, i cili shënoi dy herë në portën mike. Përgjithësisht, Vllaznia e ka dominuar takimin, sidomos në pjesën e parë, e cila u mbyll 1 me 0 për kuqeblutë. Edhe në pjesën e dytë Vllaznia e drejtuar nga trajneri Ergi Borshi, vijon të luajë më mirë duke shpërdoruar disa raste shënimi në portën vorake. Ndërkohë, në 20 minutat e fundit të ndeshjes, janë futbollistët miq, të cilët kanë disa raste të pastra për shënim duke vënë nën presion vendasit. Megjithatë, nuk do të vonojë dhe vjen goli i dytë i Vllaznisë, përsëri me autor Zahin, i cili vulos fitoren e merituar të kuqebluve me rezultatin 2 me 0.

Ndërkohë, në krahun tjetër, edhe pse u mund 2 me 0 nga Vllaznia, trajneri i Vorës, Erjon Xhafa, shprehet i kënaqur me skuadrën e tij.

Me këtë fitore të sotme ndaj Vorës, e treta radhazi pas asaj të fituar me Teutën në transfertë dhe Korabin në shtëpi, Vllaznia U-21, jep shpresa për t’iu bashkuar skuadrave pretendente për tititull.