Szczesny njofton tërheqjen: Largohem nga kombëtarja pas Euro 2024

Portieri Wojciech Szczesny ishte protagonisti i një interviste për “Foot Truck” ditën e djeshme. Ai ka njoftuar se do të largohet nga kombëtarja polake pas përfundimit të Euro 2024.

“Po, mund të themi se do të largohem pas Euro 2024. Më lejoni t’jua them, mund të jetë akoma më e vështirë të flas pas Kampionatit Evropian. Askush nuk po përpiqet të më bindë të ndryshoj këtë vendim. Familja ime e di se çfarë planesh kam dhe mendoj se ata e dinë se ky është rendi i natyrshëm i gjërave.

Nuk ka kuptim të fillojë ky cikël i ri i ekipeve kombëtare, pra përgatitja për Botërorin, nëse nuk tërhiqem. Qëndrimi në kombëtare dhe luajtja e disa ndeshjeve të Ligës së Kombeve nuk ka shumë vlerë, mendoj se është më mirë t’ua lë të tjerëve detyrën e përgatitjes së një cikli të ri”, ka thënë mes të tjerash Szczesny.