Tatimi mbi të ardhurat-Kush paguan më shumë, një i punësuar në shtet, privat apo profesionisti i lirë

Nga janari i këtij viti, me hyrjen në fuqi të ligjit të ri për tatimin mbi të ardhurat ka ndryshuar skema e tatimit mbi këto të ardhura, duke u korrigjuar një padrejtësi ligjore e bërë një dekadë më parë, që lidhej me taksimin mbi të ardhurat.

Në janar hyn në fuqi faza e parë e ligjit, që përfshin kategorinë e profesioneve të lira.

Debati, që duket se do të shkojë deri në një vendim të Gjykatës Kushtetuese, përfshin kategorinë e profesioneve të lira që, do të detyrohen, të paguajnë këtë vit, mbi bazën e të ardhurave të realizuara nga viti i kaluar.

Sipas ligjit të ri, do të paguhet 50% më pak tatim se të punësuarit, ndërsa barazohet tatimi për kategorinë me të ardhura vjetore mbi 14 milionë me shoqëritë tregtare (15% mbi fitimin dhe 8% tatim dividendi).

Sipas hartuesve të ligjit të ri, ky barazim i normës tatimore 23% është bërë për “të bllokuar” shmangien e detyrimeve tatimore.

Në vijim ju po shikoni një tabelë që lidh të ardhurat vjetore të një individi, si profesionist i lirë si dhe si i punësuar, kundrejt detyrimit tatimor ligjor.

Sikundër duket nga kjo tabelë përmbledhëse, detyrimi tatimor i profesioneve të lira, pas zbritjes së shpenzimeve dhe të ardhurave nga paga minimale është 50% më pak se tatimi mbi të ardhurat që paguajnë të punësuarit, për të ardhura vjetore nga 1 milionë deri 10 milionë lekë, apo për paga mujore nga 83 mijë lekë deri në 833 mijë lekë në muaj.

Ndryshimi është i dukshëm dhe nuk justifikon pretendimin për tatim të padrejtë. Për të punësuarit, sipas të ardhurave vjetore paguhet nga 8,3 për qind deri në 20,1 për qind. Për profesionistët e lirë, për fashën e të ardhurave nga 1 deri në 10 milionë lekë paguhet si tatim nga 5,1 për qind deri në 10 për qind.

Ndryshimi është se për profesionet e lira tatimi i të ardhurave është  50% më pak se sa tatohet një i punësuar. Pra, qeveria, përsëri favorizon më shumë profesionistët e lirë, se sa ata që kanë një punë në shtet apo në privat, ku taksimi mbi të ardhurat mbetet në një nga nivelet më të larta në rajon e më gjerë!