Të Gjelbrit paralajmërojnë fon der Lajen: Nëse bashkon forcat me të djathtën ekstreme, nuk të votojmë

Anëtarët e gjelbër të Parlamentit Evropian nuk do të mbështesin Ursula fon der Lajen (o. von der Leyen) për një mandat të dytë si presidente e komisionit nëse ajo bën një marrëveshje me nacionalistët e djathtë.

Kryetarja gjermane e eurodeputetit të Gjelbër, Terri (Terry) Reintke, deklaroi se grupi i saj nuk do të mbështeste fon der Lajen (presidenten aktuale të komisionit të qendrës së djathtë që po kërkon një mandat të dytë), nëse ajo bën një marrëveshje me grupin e kryeministres italiane Xhorxha (Giorgia) Meloni në Parlamentin Evropian, Konservatorët dhe Reformistët Evropianë (ECR).

“Ne nuk do t’i bashkohemi as koalicionit apo mazhorancës, për shembull, me ECR. Pra, atje, Ursula von der Leyen, ose kushdo që dëshiron të ndërtojë një shumicë, do të duhet të bëjë një zgjedhje”, tha Reintke.

Kjo e fundit paralajmëroi se nëse fon der Lajen bashkon forcat me ECR, e cila ka votuar vazhdimisht kundër politikave të gjelbra të BE-së, plani i BE-së për të trajtuar krizën klimatike do të ishte në rrezik.

“Ka shumë më tepër gjasa që marrëveshja e gjelbër të shkatërrohet, ose të paktën të ngadalësohet.  Do të ishte “një fatkeqësi jo vetëm për klimën, por edhe për pozitën ekonomike të Evropës” përballë konkurrencës intensive nga SHBA dhe Kina”, tha ajo.

Ursula fon der Lajen po kërkon një mandat të dytë pesë-vjeçar si presidente e komisionit në zgjedhjet e BE-së më 6-9 qershor, ku partitë nacionaliste dhe të ekstremit të djathtë në të gjithë Evropën pritet të kenë përfitime të konsiderueshme në kurriz të qendrës së djathtë tradicionale, sociale demokratë, liberalë dhe të gjelbër.

Nëse fon der Lajen emërohet nga liderët e BE-së për një mandat të dytë, ajo duhet të sigurojë një shumicë absolute të 720 eurodeputetëve të parlamentit të ri.

Ndërsa Partia Popullore Evropiane e qendrës së djathtë (EPP), e cila përfshin Kristian Demokratët gjermanë të fon der Lajen, ka të ngjarë të mbetet forca më e madhe në parlament, me 175 deputetë të mundshëm, ajo duhet të sigurojë një koalicion shumë më të gjerë.