Të hënën mblidhet Parlamenti, deputetët e opozitës do të jenë në seancë

Parlamenti mblidhet të hënën, 11 ditë pasi deputetët e opozitës ia dolën të bllokojnë seancën plenare.

Një vendim i Sekretariatit për procedurat, votimet dhe etikën që RTSH e disponon, tregon se 20 deputetë të Partisë Demokratike, duke nisur nga Sali Berisha, Flamur Noka, Albana Vokshi, Gazment Bardhi e deri te Tomor Alizoti dhe Dhurata Çupi janë të përjashtuar nga punimet e parlamentit në seancë dhe në komisionet parlamentare deri në 30 tetor, ditë që përkon edhe me mbajtjen e seancës plenare.

Deputetët janë njoftuar se seanca plenare do të mbahet të hënën në orën 17:00 dhe në rendin e ditës janë përfshirë diskutime nga deputetët pas takimeve me zgjedhësit në zonat e tyre elektorale.

Por ajo çfarë pritet ta bëjë lajm seancën e të hënës mund të jetë deklarata e ish-kryeministrit Berisha, i cili  ka bërë të ditur se opozitarët nuk do ta braktisin parlamentin, por do të jenë aty.

Vendimi i Sekretariatit është kundërshtuar nga opozitarët, të cilët thonë se seanca e fundit ishte në 19 tetor dhe sipas llogarive, përjashtimi i deputetëve është 10 ditë, kohë që përfundon më 29 tetor, pra këtë të diel.

Megjithëse seanca e parlamentit ka një rend dite rutinë, sjellja dhe deklaratat e opozitës marrin tjetër rëndësi, në kushtet kur ndaj z. Berisha janë ngritur akuzat e Prokurorisë së Posaçme dhe ndaj tij ka një masë për detyrim paraqitjeje pranë oficerit të policisë gjyqësore me një kalendar të mirëpërcaktuar.