Tentuan ta grabisin, vritet me armë zjarri futbollisti në Afrikën e Jugut

Luke Fleurs ishte 24 vjeç dhe ëndërronte të ndiqte karrierën e idhullit të tij Carles Puyol. Ai u qëllua për vdekje të mërkurën në mbrëmje nga kriminelët që donin t’i vidhnin makinën në një pikë karburanti në periferi të Johanesburgut.

Sipas zëdhënësit të policisë së Gauteng, nënkoloneli Mavela Masondo, mbrojtësi i Afrikës së Jugut hyri në pikën e karburantit dhe ndërsa po priste që punonjësi i benzinës t’i shërbente, ai u përball me dy burra të armatosur, të cilët i drejtuan një armë zjarri dhe e tërhoqën zvarrë jashtë automjetit dhe më pas e qëlluan në pjesën e sipërme të trupit.

Fleurs është transportuar menjëherë në spitalin më të afërt, ku ka ndërruar jetë. “Një i dyshuar u largua me makinën e viktimës, i ndjekur nga bashkëpunëtori i tij,” shtoi Masondo, i cili gjithashtu konfirmoi se nuk ka ndodhur ende asnjë arrestim.

Fleurs kishte nënshkruar për Kaizer Chiefs, një klub në lagjen Soweto të Johanesburgut, i cili luan në Superligën e Afrikës së Jugut, tetorin e kaluar. Ai kishte luajtur më parë për SuperSport United. Ai luajti me U-21 të Afrikës së Jugut në Lojërat Olimpike të Tokios në 2021.