Tërmeti në Mianmar, shkon në 2.800 numri i viktimave
Ka shkuar në 2.886 numri i personave që kanë humbur jetën si pasojë e tërmetit shkatërrues me magnitudë 7.7 sipas shkallës Rihter, që goditi Mianmarin të premten e shkuar, duke u ndier edhe në vendet fqinje.
Sipas juntës ushtarake të vendit, 4.639 persona janë lënduar dhe 373 janë zhdukur pas fatkeqësisë natyrore.
Ndërsa shpresat për gjetjen e të mbijetuarve janë të vakëta, një 26-vjeçar, punonjësi i një hoteli në kryeqytetin e vendit, u nxor i gjallë nga rrënojat e objektit.
Organizata Botërore e Shëndetësisë raportoi për dëme masive në qytetin e Sagaingut, pranë të cilit ishte epiqendra e tërmetit. Sipas Organizatës, një në tri banesa të qytetit janë shembur.
Objektet e kujdesit shëndetësor, të dëmtuara nga tërmeti dhe me kapacitet të kufizuar, janë tejmbushur nga numri i madh i pacientëve. Në vend, ndërkohë, ka mungesë ushqimesh, uji dhe medikamentesh.
Disa grupe të armatosura, që luftojnë me qeverinë e vendit, kanë pezulluar për momentin aktivitetet antiqeveritare, por kreu i juntës u shpreh se operacionet ushtarake do të vijojnë, pavarësisht kritikave të ndërkombëtarëve për sulmet ajrore.
