Transformimi i shkollës “Ndre Mjeda”- Qindra nxënës do ta zhvillojnë mësimin në kushte dinjitoze
Një tjetër kantier pune i është shtuar Shkodrës, ku ka nisur puna për rikonstruksionin e plotë të shkollës 9-vjeçare “Ndre Mjeda”.
Ky është një investim tjetër që Bashkia Shkodër ka përfituar nga aplikimi i projekteve pranë Ministrisë së Arsimit dhe Qeverisë Shqiptare.
Një ndërhyrje e shumëpritur për këtë shkollë me traditë dhe histori, që ka shërbyer për breza të shumtë të qytetit.
Video e punimeve nga shkolla u shpërnda ditën e sotme nga kryeministri Edi Rama në llogarinë e tij në Facebook.
Vlera e investimit me TVSH është rreth 130 milion lekë, ndërsa afati i punimeve është 12 muaj.
Me një pamje krejtësisht të re dhe kushte bashkëkohore, shkolla do të presë së shpejti në mjedisin e saj të ri mbi 700 nxënës dhe mësues.
Shkodra ka hyrë në një fazë të re investimesh në institucionet arsimore.
Në sajë të mbështetjes së Ministrisë së Arsimit dhe Sportit, puna po vijon edhe në shkollat “Dëshmorët e Prishtinës” dhe “Kolë Idromeno”, ndërsa janë ndërtuar dy terrene sportive në shkollat “Prenk Jakova” dhe “Adem Haxhija”.
