Transparencë qiradhënies, BE kërkon rregulla të reja për platformat e akomodimit “Airbnb” dhe “Booking.com”

Platformat e akomodimit në internet si “Airbnb” dhe “Booking.com” do të duhet të ndajnë më shumë të dhëna me autoritetet në vendet anëtare të BE-së ku operojnë, ka njoftuar përmesë një shkrimi  Këshilli Evropian dhe Parlamenti Evropian.

“Propozimi për një rregullore synon të rrisë transparencën në fushën e qiradhënies afatshkurtër të akomodimit dhe të ndihmojë autoritetet publike të rregullojnë këtë pjesë gjithnjë e më të rëndësishme të sektorit të turizmit”, u njoftua nga KE.

Ndërsa raportuesi i Parlamentit Evropian Kim Van Sparrentak tha se qytetet po luftojnë me një shpërthim të qirave të paligjshme për pushime. Kjo e vë nën presion jetueshmërinë dhe përballueshmërinë e qyteteve anembanë Evropës.

Pronarët janë në gjendje të fitojnë më shumë nga qiratë afatshkurtra për turistët sesa nga qiramarrësit e përhershëm, por kjo çon në mungesa në tregun e qirave për banorët.

Destinacionet e njohura të BE-së, si Amsterdami, Berlini dhe Dublini tashmë vendosin kufizime për sa kohë mund të lejohet akomodimi për turistët, dhe të dhënat e reja synojnë të lehtësojnë zbatimin e këtyre rregullave. Rregullat do të hyjnë në fuqi brenda dy viteve. Platformave do t’u kërkohet të ndajnë të dhënat e tyre çdo muaj.