Trofeu “Agim Tafili” në çiklizëm – Olsian Velia i ekipit të Tiranës u rendit i pari në etapën e ditës së parë
Në Shkodër ka startuar edicioni i radhës i Trofeut “Agim Tafili”, një garë që ka zënë vend në kalendarin kombëtar të çiklizmit.
Dita e parë e këtij aktiviteti, që përfshiu itinerarin 135 kilometra Europa Park – Mbi kalimi Rrëshen – Shkodër u mbyll me fitoren e çiklistit të ekipit “Tirana”, Olsian Velia, i cili mbërriti i pari në finish.
Presidenti i Federatës Shqiptare të Çiklizmit, Skënder Anxhaku, vlerësoi cilësinë e garës dhe përkushtimin e sportistëve, duke theksuar rëndësinë e këtij trofeu.
Pas garës u zhvillua një ceremoni vlerësimi për më të mirët e ditës së parë.
Në ceremoni përshëndeti edhe zëvendëskryetari i Bashkisë Shkodër, Rudin Beka.
Me rastin e 100-vjetorit të garës së parë çiklistike në Shqipëri, në hollin e Bashkisë Shkodër u çel edhe një ekspozitë e cila pasqyron momentet më të rëndësishme të historisë së këtij sporti në vend.
Në këtë aktivitet u vlerësuan me çertifikata mirënjohjeje edhe gazetarët sportivë Gaspër Marku dhe Gjergj Kola, për kontributin e tyre në pasqyrimin e çiklizmit ndër vite, si dhe figura të tjera të rëndësishme të çiklizmit shqiptar.
