Trump mban fjalimin e parë pas fitores së zgjedhjeve
Nominimi i Robert Kennedy Jr nga Donald Trump për sekretar të Shëndetësisë ka nxitur kritika në SHBA, por presidenti i sapo zgjedhur vlerësoi aktivistin kundër vaksinave anti-COVID gjatë fjalimit të tij të parë publik që nga fitorja e zgjedhjeve të 5 nëntorit.
Trump tha se Kennedy do të ndihmojë për ta bërë Amerikën përsëri të shëndetshme, duke i mbrojtur qytetarët nga kimikatet e dëmshme, pesticidet, dhe produktet farmaceutike. Shoqata Amerikane e Shëndetit Publik kundërshtoi emërimin e Kennedy, duke thënë se ai është njeriu i gabuar dhe i pakualifikuar në drejtimin e një departamenti kaq të rëndësishëm, që mbikëqyr gjithçka, që nga siguria e ushqimit deri te kërkimet mjekësore dhe programet e mirëqenies.
Gjatë fjalimit në Florida, Tump përcaktoi edhe disa nga prioritetet e presidencës së tij pasi të marrë detyrën në janar, duke përfshirë angazhimin për t’i dhënë fund konfliktit Rusi-Ukrainë. Trump u prezantua nga aktori Sylvester Stallone dhe foli para një audiencë me shumë mbështetës të profilit të lartë, duke përfshirë Elon Musk, Vivek Ramaswamy dhe presidentin argjentinas Javier Milei.
Presidenti i sapo zgjedhur në mënyrë të papritur shpalli edhe një emërim tjetër të administratës së ardhshme. Guvernatori i Dakotës së Veriut, Doug Burgum është kandidati i tij si Sekretar i Departamentit të Brendshëm.
